-
ચૈત્યવંદન ભાષ્ય
વંદિત્તુ વંદણિજ્જે, સવ્વે ચિઇવંદણાઇ સુવિયારં;
બહુવિત્તિ–ભાસ ચુણ્ણી, સુયાણુસારેણ વુચ્છામિ. ૧
દહતિગ અહિગમપણગં, દુદિસિ તિહુગ્ગહતિહા ઉ વંદણયા;
પણિવાય–નમુક્કારા, વણ્ણાસોલ–સય સીયાલા. ૨
ઇગસીઇ સયં તુ પયા, સગનઉઇ સંપયાઓ પણ દંડા;
બારઅહિગાર ચઉવંદણિજ્જ સરણિજ્જ ચઉહજિણા. ૩
ચઉરો થુઇ નિમિત્તટ્ઠ, બાર હેઊ અ સોલ આગારા;
ગુણવીસ દોસ ઉસ્સગ્ગ–માણ થુત્તં ચ સગવેલા. ૪
દસ આસાયણચાઓ, સવ્વે ચિઇવંદણાઇ ઠાણાઇં;
ચઉવીસ દુવારેહિં, દુસહસ્સા હુંતિ ચઉસયરા. ૫
તિન્નિ નિસીહી તિન્નિઉ, પયાહિણા તિન્નિ ચેવય પણામા;
તિવિહા પૂયા ય તહા, અવત્થતિય ભાવણં ચેવ. ૬
તિદિસિનિરિક્ખણ–વિરઈ, પયભૂમિપમજ્જણં ચ તિક્ખુત્તો;
વન્નાઇતિયં મુદ્દા, તિયં ચ તિવિહં ચ પણિહાણં. ૭
ઘર–જિણહર જિણપૂયા, વાવારચ્ચાયઓ નિસીહિતિગં;
અગ્ગદ્દારે મજ્ઝે, તઇયા ચિઇવંદણાસમએ. ૮
અંજલિબદ્ધો અદ્ધો–ણઓ અ પંચંગઓ અતિપણામા;
સવ્વત્થ વા તિવારં, સિરાઇનમણે પણામતિયં. ૯
અંગગ્ગભાવ–ભેયા, પુપ્ફાહાર–થુઇહિં પૂયતિગં;
પંચુવયારા અટ્ઠો–વયાર સવ્વોવયારા વા. ૧૦
ભાવિજ્જ અવત્થતિયં, પિંડત્થ પયત્થ રૂવરહિયત્તં;
છઉમત્થ કેવલિત્તં, સિદ્ધત્તં ચેવ તસ્સત્થો. ૧૧
ન્હવણચ્ચગેહિં છઉમત્થ, વત્થ પડિહારગેહિં કેવલિયં;
પલિયંકુસ્સગ્ગેહિ અ, જિણસ્સ ભાવિજ્જ સિદ્ધત્તં. ૧૨
ઉડ્ઢાહો તિરિઆણં, તિદિસાણ નિરિક્ખણં ચઇજ્જહવા;
પચ્છિમ–દાહિણ–વામાણ, જિણમુહન્નત્થ–દિટિ્ઠ–જુઓ. ૧૩
વન્નતિયં વન્નત્થા–લંબણમાલંબણં તુ પડિમાઈ;
જોગ–જિણ–મુત્તસુત્તી–મુદ્દાભેએણ મુદ્દતિયં. ૧૪
અન્નુન્નંતરિઅંગુલિ–કોસાગારેહિ દોહિં હત્થેહિં;
પિટ્ટોવરિ કુપ્પર–સંઠિએહિં તહ જોગમુદ્દત્તિ. ૧૫
ચત્તારિ અંગુલાઇં, પુરઓ ઉણાઇં જત્થ પચ્છિમઓ;
પાયાણં ઉસ્સગ્ગો, એસા પુણ હોઇ જિણમુદ્દા. ૧૬
મુત્તાસુત્તી મુદ્દા, જત્થ સમા દોવિ ગબ્ભિઆ હત્થા;
તે પુણ નિલાડદેસે–લગ્ગા અન્ને અલગ્ગત્તિ. ૧૭
પંચંગો પણિવાઓ, થયપાઢો હોઇ જોગમુદ્દાએ;
વંદણ જિણમુદ્દાએ, પણિહાણં મુત્તસુત્તીએ. ૧૮
પણિહાણતિગં ચેઇઅ–મુણિવંદણપત્થણા સરૂવં વા;
મણ–વય–કાએગત્તં, સેસ–તિયત્થો ય પયડુત્તિ. ૧૯
સચ્ચિત્તદવ્વમુજ્ઝણ–મચ્ચિત્તમણુજ્ઝણં મણેગત્તં;
ઇગસાડિ ઉત્તરાસંગ, અંજલી સિરસિ જિણ દિટ્ઠે. ૨૦
ઇઅ પંચવિહાભિગમો, અહવા મુચ્ચંતિ રાયચિણ્હાઇં;
ખગ્ગં છત્તોવાણહ, મઉડં ચમરે અ પંચમએ. ૨૧
વંદંતિ જિણેદાહિણ, દિસિટિ્ઠઆ પુરિસ વામદિસિ નારી;
નવકર જહન્નુ સટિ્ઠકર, જિટ્ઠ મજ્ઝુગ્ગહો સેસો. ૨૨
નમુક્કારેણ જહન્ના, ચિઇવંદણ મજ્ઝ દંડ–થુઇ–જુઅલા;
પણ દંડ થુઇ–ચઉક્કગ, થયપણિહાણેહિં ઉક્કોસા. ૨૩
અન્ને બિંતિ ઇગેણં, સક્કત્થએણં જહન્નવંદણયા;
તદ્દુગ–તિગેણ મજ્ઝા, ઉક્કોસા ચઉહિં પંચહિં વા. ૨૪
પણિવાઓ પંચંગો, દો જાણૂ કરદુગુત્તમંગં ચ;
સુમહત્થ–નમુક્કારા, ઇગ દુગ તિગ જાવ અટ્ઠસયં. ૨૫
અડસટિ્ઠ અટ્ઠવીસા, નવનઉયસયં ચ દુસય–સગનઉયા;
દોગુણતીસ દુસટ્ઠા, દુસોલ અડનઉયસય દુવન્નસયં. ૨૬
ઇઅ નવકાર–ખમાસમણ, ઇરિઅ–સક્કત્થઆઇદંડેસુ;
પણિહાણેસુ અ અદુરુત્ત–વન્ન સોલસય સીયાલા. ૨૭
નવ બત્તીસ તિતીસા, તિચત્ત અડવીસ સોલ વીસ પયા;
મંગલ–ઇરિયા–સક્કત્થયાઇસું એગસીઇસયં. ૨૮
અટ્ઠટ્ઠ નવટ્ઠઅટ્ઠવીસ, સોલસ ય વીસવીસામા;
કમસો મંગલ–ઇરિયા–સક્કત્થયાઇસુ સગનઉઇ. ૨૯
વણ્ણટ્ઠસટિ્ઠ નવ પય, નવકારે અટ્ઠ સંપયા તત્થ;
સગ સંપયા પય તુલ્લા, સતરક્ખર અટ્ઠમી દુ પયા. ૩૦
પણિવાય અક્ખરાઇં, અટ્ઠાવીસં તહા ય ઇરિયાએ;
નવનઉઅ–મક્ખરસયં, દુતીસ પય સંપયા અટ્ઠ. ૩૧
દુગ દુગ ઇગ ચઉ ઇગ પણ, ઇગાર છગ ઇરિય–સંપયાઇ પયા;
ઇચ્છા ઇરિ ગમ પાણા, જે મે એગિંદિ અભિ તસ્સ. ૩૨
અબ્ભુવગમો નિમિત્તં, ઓહે–અરહેઉ–સંગહે પંચ;
જીવવિરાહણ–પડિક્કમણ, ભેયઓ તિન્નિ ચૂલાએ. ૩૩
દુ–તિ–ચઉ–પણ–પણ–પણ–દુ, ચઉતિપય સક્કત્થય સંપયાઇપયા;
નમુ આઇગ પુરિસો, લોગુ, અભય ધમ્મ–પ્પજિણ સવ્વં. ૩૪
થોઅવ્વ સંપયા ઓહ, ઇયરહેઊવઓગ તદ્ધેઊ;
સવિસેસુવઓગ સરૂવ–હેઉ નિયસમ–ફલય મુક્ખે. ૩૫
દો સગનઉઆ વણ્ણા, નવસંપય પય તિતીસ સક્કત્થએ;
ચેઇયથયટ્ઠ–સંપય, તિચત્ત પય વણ્ણ–દુસયગુણતીસા. ૩૬
દુછ સગ નવ તિય છચ્ચઉ, છપ્પય ચિઇ સંપયા પયા પઢમા;
અરિહં વંદણ સદ્ધા, અન્ન સુહુમ એવ જા તાવ. ૩૭
અબ્ભુવગમો નિમિત્તં, હેઊ ઇગ–બહુવયંતઆગારા;
આગંતુગ આગારા, ઉસ્સગ્ગાવહિ સરૂવટ્ઠ. ૩૮
નામથયાઇસુ સંપય, પયસમ અડવીસ સોલ વીસ કમા;
અદુરુત્ત–વણ્ણ દોસટ્ઠ, દુસયસોલ–ટ્ઠનઉઅસયં. ૩૯
પણિહાણિ દુવન્નસયં, કમેણ સગ તિ ચઉવીસ તિત્તીસા;
ગુણતીસ અટ્ઠવીસા, ચઉતી–સિગતીસ બાર ગુરૂ વણ્ણા. ૪૦
પણદંડા સક્કત્થય, ચેઇઅ નામ સુઅ સિદ્ધત્થય ઇત્થ;
દો ઇગ દો દો પંચ ય, અહિગારા બારસ કમેણ. ૪૧
નમુ જેઅઇ અરિહં લોગ, સવ્વ પુક્ખ તમ સિદ્ધ જોદેવા;
ઉજ્જિં ચત્તા વેઆવચ્ચગ અહિગાર પઢમપયા. ૪૨
પઢમ–હિગારે વંદે, ભાવજિણે બીયએ ઉ દવ્વજિણે;
ઇગચેઇય–ઠવણ જિણે, તઇય ચઉત્થંમિ નામજિણે. ૪૩
તિહુઅણ–ઠવણ જિણે પુણ, પંચમએ વિહરમાણ જિણ છટ્ઠે;
સત્તમએ સુયનાણં, અટ્ઠમએ સવ્વસિદ્ધ થુઈ. ૪૪
તિત્થાહિવ–વીરથુઇ, નવમે દસમે ય ઉજ્જયંત–થુઈ;
અટ્ઠાવયાઈ ઇગદિસિ, સુદિટિ્ઠસુર–સમરણા ચરિમે. ૪૫
નવ અહિગારા ઇહ લલિઅ વિત્થરા વિત્તિમાઇ અણુસારા,
તિણ્ણિ સુય–પરંપરયા, બીઓ દસમો ઇગારસમો. ૪૬
આવસ્સયચુણ્ણીએ, જં ભણિયં સેસયા જહિચ્છાએ;
તેણં ઉજ્જિંતાઈ વિ, અહિગારા સુયમયા ચેવ. ૪૭
બીઓ સુયત્થયાઇ, અત્થઓ વન્નિઓ તહિં ચેવ;
સક્કત્થયંતે પઢિઓ, દવ્વારિહ–વસરિ પયડત્થો. ૪૮
અસઢાઇન્નણવજ્જં, ગીઅત્થ–અવારિઅંતિ મજ્ઝત્થા;
આયરણા વિહુ આણત્તિ, વયણઓ સુબહુ મન્નંતિ. ૪૯
ચઉવંદણિજ્જ જિણ મુણિ, સુય સિદ્ધા ઇહ સુરાઈ સરણિજ્જા;
ચઉહ જિણા નામ ઠવણ, દવ્વ ભાવ જિણ–ભેએણં. ૫૦
નામજિણા જિણનામા, ઠવણજિણા પુણ જિણિંદપડિમાઓ;
દવ્વજિણા જિણજીવા, ભાવજિણા સમવસરણત્થા. ૫૧
અહિગય–જિણ–પઢમથુઈ, બીયા સવ્વાણ તઈઅ નાણસ્સ;
વેયાવચ્ચગરાણં, ઉવઓગત્થં ચઉત્થ થુઈ. ૫૨
પાવખવણત્થ ઇરિઆઈ, વંદણવત્તિઆઈ છ નિમિત્તા;
પવયણસુર સરણત્થં, ઉસ્સગ્ગો ઇઅ નિમિત્તટ્ઠ. ૫૩
ચઉ તસ્સ ઉત્તરીકરણ, પમુહ સદ્ધાઇઆ ય પણ હેઊ;
વેયાવચ્ચગરત્તાઈ, તિન્નિ ઇઅ હેઉ બારસગં. ૫૪
અન્નત્થયાઈ બારસ, આગારા એવમાઇયા ચઉરો;
અગણી પણિંદિછિંદણ, બોહીખોભાઈ ડક્કો ય. ૫૫
ઘોડગ લય ખંભાઈ, માલુ–દ્ધી નિઅલ સબરિ ખલિણ વહૂ;
લંબુત્તર થણ સંજઈ, ભમુહંગુલિ વાયસ કવિટ્ઠો. ૫૬
સિરકંપ મૂઅ વારુણી, પેહત્તિ ચઇજ્જ દોસ ઉસ્સગ્ગે;
લંબુત્તર થણ સંજઇ, ન દોસ સમણીણ સવહુ સડ્ઢીણં. ૫૭
ઇરિ–ઉસ્સગ્ગપમાણં, પણવીસુસ્સાસ અટ્ઠ સેસેસુ;
ગંભીર–મહુર–સદ્દં, મહત્થજુત્તં હવઇ થુત્તં. ૫૮
પડિકમણે ચેઇય જિમણ, ચરિમપડિકમણ સુઅણ પડિબોહે;
ચિઇવંદણ ઇઅ જઇણો, સત્ત ઉ વેલા અહોરત્તે. ૫૯
પડિકમઓ ગિહિણોવિ હુ, સગવેલા પંચવેલ ઇઅરસ્સ;
પૂઆસુ તિસંઝાસુ અ, હોઇ તિવેલા જહન્નેણં. ૬૦
તંબોલ પાણ ભોયણુ–વાણહ મેહુન્ન સુઅણ નિટ્ઠવણં;
મુત્તુચ્ચારં જૂઅં, વજ્જે જિણનાહ જગઇએ. ૬૧
ઇરિ–નમુકાર નમુત્થુણ, અરિહંત થુઇલોગ સવ્વ થુઈ પુક્ખ;
થુઈ સિદ્ધા વેઆ થુઈ, નમુત્થુ જાવંતિ થય જયવી. ૬૨
સવ્વોવાહિવિસુદ્ધં, એવં જો વંદએ સયા દેવે;
દેવિંદવિંદ મહિઅં, પરમપયં પાવઇ લહું સો. ૬૩.
ગુરુવંદન ભાષ્ય
ગુરુવંદણમહ તિવિહં, તં ફિટ્ટા છોભ બારસાવત્તં;
સિરનમણાઇસુ પઢમં, પુણ્ણખમાસમણ–દુગિબીઅં. ૧
જહ દૂઓ રાયાણં, નમિઉં કજ્જં નિવેઇઉં પચ્છા;
વીસજ્જિઓ વિ વંદિઅ, ગચ્છઇ એમેવ ઇત્થ દુગં. ૨
આયારસ્સ ઉ મૂલં, વિણઓ સો ગુણવઓ અ પડિવત્તી;
સા ય વિહિ–વંદણાઓ, વિહી ઇમો બારસાવત્તે. ૩
તઇયં તુ છંદણ–દુગે, તત્થ મિહો આઇમં સયલસંઘે;
બીયં તુ દંસણીણ ય, પયટિ્ઠઆણં ચ તઇયં તુ. ૪
વંદણ–ચિઇ–કિઇકમ્મં, પૂઆકમ્મં ચ વિણયકમ્મં ચ;
કાયવ્વં કસ્સ વ? કેણ, વાવિ? કાહેવ? કઇ ખુત્તો?. ૫
કઇ ઓણયં? કઇ–સિરં, કઇહિ વ આવસ્સએહિ પરિસુદ્ધં?;
કઇ દોસવિપ્પમુક્કં, કિઇકમ્મં કીસ કીરઇ વા. ૬
પણનામ પણાહરણા, અજુગ્ગપણ જુગ્ગપણ ચઉ અદાયા;
ચઉદાય પણનિસેહા, ચઉ અણિસેહ–ટ્ઠકારણયા. ૭
આવસ્સય–મુહણંતય, તણુપેહ–પણીસ–દોસ બત્તીસા;
છગુણ ગુરુઠવણ દુગ્ગહ, દુછવીસક્ખર ગુરુ પણીસા. ૮
પય અડવન્ન છઠાણા, છગુરુવયણા આસાયણ–તિત્તીસં;
દુવિહી દુવીસદારેહિં, ચઉસયા બાણઉઇ ઠાણા. ૯
વંદણયં ચિઇકમ્મં, કિઈકમ્મં વિણયકમ્મં પૂઆકમ્મં;
ગુરુવંદણ–પણ–નામા, દવ્વે ભાવે દુહાહરણા (દુહોહેણ). ૧૦
સીયલય ખુડ્ડએ વીર, કન્હ સેવગ દુ પાલએ–સંબે;
પંચે એ દિટ્ઠંતા, કિઇકમ્મે દવ્વ–ભાવેહિં. ૧૧
પાસત્થો ઓસન્નો, કુસીલ સંસત્તઓ અહાછંદો;
દુગ–દુગ–તિ–દુગ–ણેગવિહા, અવંદણિજ્જા જિણમયંમિ. ૧૨
આયરિય ઉવજ્ઝાએ, પવત્તિ થેરે તહેવ રાયણિએ;
કિઇકમ્મ નિજ્જરટ્ઠા, કાયવ્વ–મિમેસિ પંચણ્હં. ૧૩
માય પિઅ જિટ્ઠ–ભાયા, ઓમાવિ તહેવ સવ્વરાયણિએ;
કિઇકમ્મ ન કારિજ્જા, ચઉસમણાઈ કુણંતિ પુણો. ૧૪
વિક્ખિત્ત પરાહુત્તે, અ પમત્તે મા કયાઇ વંદિજ્જા;
આહારં નીહારં, કુણમાણે કાઉકામે અ. ૧૫
પસંતે આસણત્થે અ, ઉવસંતે ઉવટિ્ઠએ;
અણુન્નવિ ત્તુ મેહાવી, કિઇકમ્મં પઉંજઇ. ૧૬
પડિકમણે, સજ્ઝાએ, કાઉસ્સગ્ગા–વરાહ પાહુણએ;
આલોયણ સંવરણે, ઉત્તમટ્ઠે ય વંદણયં. ૧૭
દોવણય મહાજાયં, આવત્તા બાર ચઉસિર તિગુત્તં;
દુપવેસિગ–નિક્ખમણં, પણવીસાવસય કિઇકમ્મે. ૧૮
કિઇકમ્મંપિ કુણંતો, ન હોઇ કિઇકમ્મ–નિજ્જરાભાગી;
પણવીસા મન્નયરં, સાહુ ઠાણં વિરાહંતો. ૧૯
દિટિ્ઠપડિલેહ એગા, છ ઉડ્ઢપપ્ફોડ તિગ–તિગં–તરિઆ;
અક્ખોડ પમજ્જણયા, નવ નવ મુહપત્તિ પણવીસા. ૨૦
પાયાહિણેણ તિઅ તિઅ, વામેઅર બાહુ સીસ મુહ હિયએ;
અંસુડ્ઢાહો પિટ્ઠે, ચઉ છપ્પય દેહ–પણવીસા. ૨૧
આવસ્સએસુ જહ જહ, કુણઇ પયત્તં અહીણ–મઇરિત્તં
તિવિહકરણોવઉત્તો, તહ તહ સે નિજ્જરા હોઇ. ૨૨
દોસ અણાઢિઅ થડિ્ઢઅ, પવિદ્ધ પરિપિંડિઅં ચ ટોલગઇં;
અંકુસ કચ્છભ–રિંગિઅ, મચ્છુવ્વત્તં મણપઉટ્ઠં. ૨૩
વેઇયબદ્ધ ભયંતં, ભય ગારવ મિત્ત કારણા તિન્નં;
પડિણીય રુટ્ઠ તજ્જિઅ, સઢહીલિઅ વિપલિઉં ચિયયં. ૨૪
દિટ્ઠમદિટ્ઠં સિંગં, કર તમ્મોઅણ અણિદ્ધણાલિદ્ધં;
ઊણં ઉત્તરચૂલિઅ, મૂઅં ઢડ્ઢર ચુડલિયં ચ. ૨૫
બત્તીસદોસપરિસુદ્ધં, કિઇકમ્મંજો પઉંજઇ ગુરૂણં;
સો પાવઇ નિવ્વાણં, અચિરેણ વિમાણવાસંવા. ૨૬
ઇહ છચ્ચ ગુણા વિણઓ–વયાર માણાઇ ભંગ ગુરુપૂઆ;
તિત્થયરાણ ય આણા, સુઅધમ્મા–રાહણા કિરિયા. ૨૭
ગુરુગુણજુત્તં તુ ગુરું, ઠાવિજ્જા અહવ તત્થ અક્ખાઈ;
અહવા નાણાઇતિઅં, ઠવિજ્જ સક્ખં ગુરુઅભાવે. ૨૮
અક્ખે વરાડએ વા, કટ્ઠે પુત્થે અ ચિત્તકમ્મે અ;
સબ્ભાવમસબ્ભાવં, ગુરુઠવણા–ઇત્તરાવકહા. ૨૯
ગુરૂવિરહંમિ ઠવણા, ગુરૂવએસોવદંસણત્થં ચ;
જિણવિરહંમિ જિણબિંબ સેવણા મંતણં સહલં. ૩૦
ચઉદિસિ ગુરૂગ્ગહો ઇહ, અહુટ્ઠ તેરસ કરે સપરપક્ખે;
અણણુન્નાયસ્સ સયા, ન કપ્પએ તત્થ પવિસેઉં. ૩૧
પણ તિગ બારસ દુગ તિગ, ચઉરો છટ્ઠાણ પય ઇગુણતીસં;
ગુણતીસ સેસ આવસ્સયાઈ, સવ્વપય અડવન્ના. ૩૨
ઇચ્છાય અણુન્નવણા, અવ્વાબાહં ચ જત્ત જવણા ય;
અવરાહખામણાવિ ય, વંદણદાયસ્સ છટ્ઠાણા. ૩૩
છંદેણ ણુજાણામિ, તહત્તિ તુબ્ભં પિ વટ્ટએ એવં;
અહમવિ ખામેમિ તુમં, વયણાઇં વંદણરિહસ્સ. ૩૪
પુરઓ પક્ખાસન્ને, ગંતા ચિટ્ઠણ નિસીઅણા–યમણે;
આલોયણ પડિસુણણે, પુવ્વાલવણે અ આલોએ. ૩૫
તહ ઉવંદસ નિમંતણ, ખદ્ધા–યયણે તહા અપડિસુણણે;
ખદ્ધત્તિ ય તત્થગએ, કિં તું તજ્જાય નોસુમણે. ૩૬
નો સરસિ કહંછિત્તા, પરિસંભિત્તા અણુટિ્ઠયાઇ કહે;
સંથારપાયઘટ્ટણ, ચિટ્ઠુ–ચ્ચ–સમાસણે આવિ. ૩૭
ઇરિયા કુસુમિણુસગ્ગો, ચિઇવંદણ પુત્તિ વંદણાલોયં,
વંદણ ખામણ વંદણ, સંવર ચઉછોભ દુસજ્ઝાઓ. ૩૮
ઇરિયા ચિઇવંદણ પુત્તિ, વંદણ ચરિમવંદણાલોયં;
વંદણ ખામણ ચઉછોભ, દિવસુસગ્ગો દુસજ્ઝાઓ. ૩૯
એયં કિઇકમ્મવિહિં, જુંજંતા ચરણકરણમાઉત્તા;
સાહૂ ખવંતિ કમ્મં, અણેગભવસંચિયમણંતં. ૪૦
અપ્પમઇભવ્વબોહત્થ, ભાસિયં વિવરિયં ચ જમિહ મએ;
તં સોહંતુ ગિયત્થા, અણભિનિવેસી અમચ્છરિણો. ૪૧
પચ્ચક્ખાણ ભાષ્ય
દસ પચ્ચક્ખાણ ચઉવિહિ, આહાર દુવીસગાર અદુરુત્તા;
દસ વિગઈ તીસ વિગઇગય, દુહભંગા છસુદ્ધિ ફલં. ૧
અણાગયમઇક્કંતં, કોડીસહિયં નિયંટિ અણગારં;
સાગાર નિરવસેસં, પરિમાણકડં સકે અદ્ધા. ૨
નવકારસહિઅ પોરિસિ, પુરિ–મડ્ઢે–ગાસણે–ગઠાણે અ;
આયંબિલ અભતટ્ઠે, ચરિમે અ અભિગ્ગહે વિગઈ. ૩
ઉગ્ગએ સૂરે અ નમો, પોરિસિ પચ્ચક્ખ ઉગ્ગએ સૂરે;
સૂરે ઉગ્ગએ પુરિમં, અભતટ્ઠં પચ્ચક્ખાઇત્તિ. ૪
ભણઇ ગુરૂ સીસો પુણ, પચ્ચક્ખામિત્તિ એવ વોસિરઇ;
ઉવઓગિત્થપમાણં ન પમાણં વંજણચ્છલણા. ૫
પઢમે ઠાણે તેરસ, બીએ તિન્નિઉ તિગાઈ તઇઅંમિ;
પાણસ્સ ચઉત્થંમિ, દેસવગાસાઈ પંચમએ. ૬
નમુ પોરિસિ સડ્ઢા, પુરિમવડ્ઢ અંગુટ્ઠમાઈ અડ તેર;
નિવિ વિગઇંબિલ તિય તિય, દુ ઇગાસણ એગઠાણાઈ. ૭
પઢમંમિ ચઉત્થાઇ, તેરસ બીયંમિ તઇય પાણસ્સ;
દેસવગાસં તુરિએ, ચરિમે જહ સંભવં નેયં. ૮
તહ મજ્જ પચ્ચક્ખાણેસુ, ન પિહુ સૂરુગ્ગ–યાઇ વોસિરઇ;
કરણવિહી ઉ ન ભન્નઇ, જહાવસીયાઈ બિઅછંદે. ૯
તહ તિવિહ પચ્ચક્ખાણે, ભન્નંતિ અ પાણગસ્સ આગારા;
દુવિહાહારે અચિત્ત, ભોઇણો તહ ય ફાસુજલે. ૧૦
ઇત્તુચ્ચિય ખવણંબિલ, નિવિયાઈસુ ફાસુયં ચિય જલં તુ;
સડ્ઢા વિ પિયંતિ તહા, પચ્ચક્ખંતિ ય તિહાહારં. ૧૧
ચઉહાહારં તુ નમો, રત્તિંપિ મુણીણ સેસ તિહ–ચઉહા;
નિસિ પોરિસિપુરિમેગા–સણાઇ સડ્ઢાણદુ–તિચઉહા. ૧૨
ખુહપસમ–ખમેગાગી, આહારિ વ એઈ દેઈ વા સાયં;
ખુહિઓ વિ ખિવઈ કુટ્ઠે, જં પંકુવમં તમાહારો. ૧૩
અસણે મુગ્ગોયણસત્તુ–મંડ પય ખજ્જ રબ્બકંદાઇ;
પાણે કંજિય જવ કયર, કક્કડો–દગ સુરાઇજલં. ૧૪
ખાઇમે ભત્તોસ ફલાઈ, સાઇમે સુંઠિ જીર અજમાઇ;
મહુ ગુડ તંબોલાઈ, અણહારે મોય નિંબાઈ. ૧૫
દો નવકારિ છ પોરિસિ, સગ પુરિમડ્ઢે ઇગાસણે અટ્ઠ;
સત્તેગઠાણિ અંબિલિ, અટ્ઠ પણ ચઉત્થિ છ પાણે. ૧૬
ચઉ ચરિમે ચઉ ભિગ્ગહિ, પણ પાવરણે નવટ્ઠ નિવ્વીએ;
આગારુક્ખિત્ત વિવેગ, મુત્તું દવ વિગઇ નિયમિ–ટ્ઠ. ૧૭
અન્ન સહ દુ નમુકારે, અન્ન સહ પ્પચ્છદિસ ય સાહુ સવ્વ;
પોરિસિ છ સડ્ઢપોરિસિ, પુરિમડ્ઢે સત્ત સમહતરા. ૧૮
અન્ન સહસ્સાગારિઅ, આઉંટણ ગુરુઅ પારિ મહ સવ્વ;
એગ બિઆસણિ અટ્ઠઉ, સગ ઇગઠાણે અઉંટ વિણા. ૧૯
અન્ન સહ લેવા ગિહ, ઉક્ખિત્ત પડુચ્ચ પારિ મહ સવ્વ;
વિગઇ નિવ્વિગએ નવ, પડુચ્ચ વિણુ અંબિલે અટ્ઠ. ૨૦
અન્ન સહ પારિ મહ સવ્વ, પંચ ખવણે છ પાણિ લેવાઇ;
ચઉ ચરિમંગુટ્ઠાઈ, ભિગ્ગહિ અન્ન સહ મહ સવ્વ. ૨૧
દુદ્ધ–મહુ–મજ્જ–તિલ્લં, ચઉરો દવવિગઇ ચઉર પિંડદવા;
ઘય–ગુલ દહિયં પિસિયં, મક્ખણ–પક્કન્ન દો પિંડા. ૨૨
પોરિસિ સડ્ઢઅવડ્ઢ, દુભત્ત નિવ્વિગઇ પોરિસાઈ સમા;
અંગુટ્ઠમુટિ્ઠગંઠી–સચિત્ત દવ્વાઇભિગ્ગહિયં. ૨૩
વિસ્સરણમણા–ભોગો, સહસાગારો સયં મુહપવેસો;
પચ્છન્નકાલ મેહાઇ, દિસિ વિવજ્જાસુ દિસિમોહો. ૨૪
સાહુવયણ ઉગ્ઘાડા–પોરિસિ તણુસુત્થયા સમાહિત્તિ;
સંઘાઇકજ્જ મહત્તર, ગિહત્થ–બંદાઈ સાગારી. ૨૫
આઉંટણ મંગાણં, ગુરુ–પાહુણ–સાહુ ગુરુઅભુટ્ઠાણં;
પરિઠાવણ વિહિગહિએ, જઇણ પાવરણિ કડિપટ્ટો. ૨૬
ખરડિય લૂહિઅ ડોવાઇ, લેવ સંસટ્ઠ ડુચ્ચ મંડાઇ;
ઉક્ખિત્તપિંડ વિગઇણ, મક્ખિયં અંગુ–લીહિં મણા. ૨૭
લેવાડં આયામાઈ, ઇઅર સોવીરમચ્છ–મુસિણજલં;
ધોઅણ બહુલ સસિત્થં, ઉસ્સેઇમ ઇઅર સિત્થવિણા. ૨૮
પણ ચઉ ચઉ દુ દુવિહ, છ ભક્ખ દુદ્ધાઇ વિગઇ ઇગવીસં;
તિદુ તિ ચઉવિહ અભક્ખા, ચઉ મહુમાઇ વિગઇ બાર. ૨૯
ખીર ઘય દહિઅતિલ્લં, ગુડ પક્કન્નં છ ભક્ખવિગઈઓ;
ગો–મહિસિ–ઉટ્ટિ–અયએલગાણ પણ દુદ્ધ અહ ચઉરો. ૩૦
ઘય દહિઆ ઉટ્ટિવિણા, તિલ સરિસવ અયસિલટ્ટ તિલ્લચઊ;
દવગુડ પિંડગુડા દો, પક્કન્નં તિલ્લઘયતલિયં. ૩૧
પયસાડિ–ખિર–પેયા, વલેહિ દુદ્ધટ્ટિ દુદ્ધ વિગઇગયા;
દક્ખ બહુ અપ્પ તંદુલ, તચ્ચુન્નં બિલસહિઅ દુદ્ધે. ૩૨
નિબ્ભંજણ વીસંદણ, પક્કોસહિતરિય કિટ્ટિ પક્કઘયં;
દહિએ કરંબ સિહરિણિ, સલવણ દહિ ઘોલ ઘોલવડા. ૩૩
તિલકુટ્ટી નિબ્ભંજણ, પક્કતિલ પક્કુસહિ તરિય તિલ્લમલી;
સક્કર ગુલવાણય, પાય ખંડ અદ્ધકઢિ ઇક્ખુરસો. ૩૪
પૂરિય તવ પૂઆ બિય, પૂઅ તન્નેહ તુરિય ઘાણાઈ;
ગુલહાણી જલલપ્પસિ, ય પંચમો પુત્તિકય પૂઓ. ૩૫
દુદ્ધ દહી ચઉરંગુલ, દવગુડ ઘય તિલ્લ એગ ભત્તુવરિં;
પિંડગુલ મક્ખણાણં, અદ્દામલયં ચ સંસટ્ઠં. ૩૬
દવ્વહયા વિગઇ વિગઇ–ગયં પુણો તેણ તં હયં દવ્વં;
ઉદ્ધરિએ તત્તંમિ ય, ઉક્કિટ્ઠ દવ્વં ઇમં ચન્ને. ૩૭
તિલસક્કુલિ વરસોલાઈ, રાયણંબાઇ દક્ખવાણાઈ;
ડોલી તિલ્લાઈ ઇઅ, સરસુત્તમ દવ્વ લેવ કડા. ૩૮
વિગઇગયા સંસટ્ઠા, ઉત્તમદવ્વાઈ નિવ્વિગઇયંમિ;
કારણજાયં મુત્તું, કપ્પંતિ ન ભુત્તું જં વુત્તં. ૩૯
વિગઇં વિગઇભીઓ, વિગઇગયં જો અ ભુંજએ સાહૂ;
વિગઈ વિગઇસહાવા, વિગઈ વિગઇં બલા નેઇ. ૪૦
કુત્તિય મચ્છિય ભામર, મહુંતિહા કટ્ઠ પિટ્ઠ મજ્જ દુહા;
જલ થલ ખગમંસતિહા, ઘયવ્વ મક્ખણ ચઉઅભક્ખા. ૪૧
મણ વયણ કાય મણવય, મણતણુ વયતણુ તિજોગિ સગસત્ત;
કર કારણુમઈ દુતિ જુઈ, તિકાલિ સીયાલ–ભંગ–સયં. ૪૨
એયં ચ ઉત્તકાલે, સયં ચ મણ વયણ તણૂહિં પાલણિયં;
જાણગ–જાણગ પાસિ ત્તિ, ભંગ–ચઉગે તિસુઅણુણ્ણા. ૪૩
ફાસિય પાલિય સોહિય, તીરિય કિટ્ટિય આરાહિય છ સુદ્ધં;
પચ્ચક્ખાણં ફાસિય, વિહિણોચિય–કાલિ જં પત્તં. ૪૪
પાલિય પુણ પુણ સરિયં, સો હિય ગુરુદત્તસેસ ભોયણઓ;
તીરિય સમહિય કાલા, કિટ્ટિય ભોયણસમય સરણા. ૪૫
ઇઅ પડિઅરિઅં આરાહિયં, તુ અહવા છ સુદ્ધિ સદ્દહણા;
જાણણ વિણય–ણુભાસણ, અણપાલણ ભાવ–સુદ્ધિત્તિ. ૪૬
પચ્ચક્ખાણસ્સ ફલં, ઇહ પરલોએ ય હોઇ દુવિહં તુ;
ઇહલોએ ધમ્મિલાઈ, દામન્નગમાઈ પરલોએ. ૪૭
પચ્ચક્ખાણમિણં સેવિઊણ, ભાવેણ જિણવરુદ્દિટ્ઠં;
પત્તા અણંત જીવા, સાસયસુક્ખં અણાબાહં. ૪૮
